سرقت اسبوع مطروحى قبل رمضان

"ماتزوقينى يا ماما .. اوام يا ماما ..ماتزوقينى يا ماما .. اوام يا ماما.. ده عريسى هياخدنى بالسلامه يا ماما"
فضلت الاغنيه دى تتردد على لسان بنت خالتى..اللى معداش سنها ال 8 سنوات و معداش طولها ال 80 سم..و لما اقول تتردد فأنا اقصد انها بتردد على مدار اليوم لمده اسبوع كامل قضيته فى مرسى مطروح عند خالتى..و طبعا يصاحب الاغنيه حركات لولبيه اخدتها رمز للمياصه و البنوته"بفتح الواو"..و فضلت انا بضلين..ضل مسببه النور..و ضل آدمى اسمه "سهيله"...لحد ما بقيت ادعى ان عريس الغفله ده ييجى اوام فعلا و ياخدها من على ودانى..و فى وسط مانا بدعى ربنا ان العريس ده ييجى او ان سهيله يجيلها زغطة..سمعت "كريم"_و هو نسخه قزمة من (الضيف احمد)_بيسأل مصطفى اخويا"أبيه مصطفى..هو السندوتش فى مؤمن بكام" و يرد مصطفى " يعنى يا كركر حوالى عشرين جنيه ولا حاجة"و هنا يبدأ كوكو عادته فى تضخيم الارقام مجرد ما يسمع رقم و يرد"عشرين جنيه..همممم..اه..و ممكن بميت جنيه..بخمسميت جنيه..بألف جنيه..بخمسميه و خمسن الف جنيه....." و يسكت غالبا لأن الارقام اللى عرفها خلصت..و يفضل يفكر فى سعر جديد لسندوتش مؤمن و نفضل احنا مستنين بخباثه الرقم الجديد..و فجأه يفتح بؤه "بشلن" و هنا نقع كلنا على الارض من الضحك بما فينا كريم نفسه..و ييجى اخوهم الاكبر محمد و يقوله"و الله كنت طيب يا كريم" ودى البديل المخفى لجمله "ربنا يكملك بعقلك يا كريم"...و بعد طول انتظار الاقى الموبايل اللى مبيفارقش ليدى بيترعش فأقوم اجرى على البلكونه..قلبى سابقنى على هناك اصلا و هو بيشد الموبايل من ايدى..و اسمع احلى الو من أحن "سمسم" فى الدنيا

تحقيق

لقيتنى مخنوقه جدا..لقيتنى لازم اعمل حاجة عشان اخرس الدوشه اللى فى دماغى..قلت افتح البلوج اللى كنت قررت اسيبه..قلت اشوف ردود الناس اللى فجأه سبتهم
..لقيت داود بيحاول يطلعنى من المود بتاج عنده..رحت اقراه و قلت لازم هارد عليه .
بدأت تدون من أمتى ودخلت العالم ده ازاى؟
من شهر 5 سنه2007 ..اتنين من اصحابى اقترحوا الموضوع..وواحده اتحمست و صممت البلوج..و كتبت اول موضوع و بدأنا بعدها..انا عن نفسى كتبت بعدها من قبيل الغيرة :)
ايه كان انطباعك فى البدايه؟
كنت حاسه انى مش هقدر أكمل..هييجى يوم و قلمى يفضى..و ساعتها مش هعرف اقول ايه للناس اللى ردوا علينا و شجعونا جدا واللى من اول بوست كانوا معانا

مين أكتر واحد بتهتم بتعليقه على بوستك الجديد؟
فى البلوج التانى بيبقى احمد غنيم...هنا كل اللى بيردوا بهتم بردودهم..لسبب مهم..انى نادرا ما بزور بلوجات دلوقتى..و رغم كده هم جم و عبرونى و اهتموا يسمعونى..مش ناس بيردوا مجامله
و أهم حد بحب "اسمع" تعليقه هو اسلام قطقوطى
مين اتعرفت عليه من خلال المدونات ونفسك تتعرف عليه فى الحقيقه؟
ناس كتيييير جدا..غنيم..المخرج زيكا..سفاح كرموز..و الكنج احمد المصرى..ايمان..واحده مفروسه..ليكوريكا..اسامة..داود..حاتم صاحب "ولو"..كل المدونيين لان بحسهم اصحاب اوفيا اوى
لدرجة انى نفسى انظم فى رمضان افطار للمدونين اشوفهم كلهم من السنة اللى فاتت
ايه أهم حاجه اتعلمتها من عالم التدوين؟
اكتب اللى يريحك مش اللى يريح الناس..و عدد التعليقات مش معيار لروعه الكتابه
ايه أكتر حاجه كرهتها فى عالم التدوين؟
انى بقصر جدا فى زياراتى للمدونين التانين..و ناس كتير بتزعل من كده..و ان لازم التزم بأنى ما اسيبش البلوج فترة طويله..و ان فيه ناس مريضه العالم ده بيديها حريه اكتر ما تستحق فبيبلونا بمرضهم...و ان سهل واحد عنده فكر معين ينشره على مدى واسع بغض النظر عن مدى غلطه
ممكن تدى مثال عن اللى بتحلم تلاقيه فى عالم التدوين؟
حاليا انا متوقفه عن اى احلام و تمنيات..عموما
حاسس ان التدوين ليه تأثير؟
راحة نفسيه فى الكلام..لأن انا ممكن اعيط براحتى و انا ادام شاشه الكمبيوتر..و تغيير المزاج..ده بالنسبالى..فيه ناس تانيه بتاخدها المصدر الاساسى للمعلومات العامة او الاحداث الجاريه..بس الصراحة انا مش كده
كلمه أخيره؟
يعنى سبتوا كل الكلام اللى فوق ده و جاين تسألونى على كلمه

خايفه(تحديث)

يارب انا خايفه أيأس من رحمتك..خايفه بجد
مش عارفه الغلط فين..من كام سنه فضلت ادعى فى كل ركعه و كل سجدة..بين الادان و الاقامه..اول مابفطر فى رمضان..وانا فى زياره المريض..فضلت ادعى فى كل وقت قالولى فيه الدعاء مستجاب.. ان احمد يخف من السرطان..و ربنا ماكتبلوش الشفا.. و مات قلت اكيد فى رحمة انا ماعرفهاش..اكيد ربنا كده بيبتلى عمتى عشان يغفرلها؟؟اكيد ربنا بيرحمنا كلنا ..بعدها دعيت لجدو يخف..دعيتله فى كل وقت..دعيت و دعيت و دعيت..و جدو مات ..اكيد ربنا رحمه من الام المرض..اكيدفى حكمة..بعدها دعيت ..بس المرة دى كان فلا ايدى كمان غير انى ادعى..فذاكرت انا و اسلام ..لازم ينجح عشان موضوعنا يكمل..ماكنش بينام عشان يذاكر..هو اللى كان بيخلينى اراجع الماده بعد ما اخلصها لما كنت ااشوفه بيراجعها..قاللى يارب اجيب مقبول قلتله ان شاء الله تجيب جيد هو اللى كان بيعلمنى اشتغل عملى ازاى..و دعيت و دعيت و دعيت يجيب تقدير..اصله تعب....و جت النتيجة.. شايل مادتين ....ده ماكنش بيذاكرقبل كده و كان بيجيب احسن من كده و كان بيعدى..ده كان بيفتح الكتاب قبل الامتحان بيوم و بيعدى..ازاى لما يذاكر يشيل مادتين و الباقى مقبول..و طبعا باباه فى ساعتها رد"مافيش فايده فيك" .. و كفايه اوى الكلمة دى..كل المرات دى كنت بدعيلهم و مش بدعيلى..بخاف ليكون دعوتى هتستجاب فى المرة الوحيدة اللى ما دعيلهومش فيها و ادعيلى..و لما لقيتنى ببعد عن ربنا..بغلط و بتمادى فى الغلط..لما لقيتنى بيأس من رحمته..دعيت ربنا يرجعنى زى زمان..اول مرة ادعي عشانى..و ..و برضه لسه ببعد..و برضه بغلط بزيادة.و برضه اليأس بيزيد.."انا عند ظن عبدى بى" اللى ماكنتش عارفه اسكتها فى دماغى بأه صوتها يوطى فى ودانى لحد ماتخرس..يمكن دى حاجة هايفه بالنسبالكم..بس بالنسبالى دى القشه اللى قسمت ظهرى...
للدرجة دى انا ربنا ما بيحبنيش..

تأخذنى الايام بعيدا عنه..ثم فجأة اتذكره..فأشعر بالهلع..كيف تناسيته كل تلك الفترة..فأجرى اليه مشتاقه..اطرق بابه برفق..وأدلف للداخل بهدووء تام..اتفقد ملامح ما حولى..اسمع دندنه موسيقيه حتى لأشعر بروحى تطفو برفق..أكاد اراها تتمايل فى الهواء منتشيه..و ترتسم تلك الابتسامه على فمى..ابتسامه عهدتها عند زيارتى له فقط .. ابحث فى لهفه عن كلماته..كم اشتقت لها..ابحث عنها حتى القاها..اجرى مسرعه بين حروفها..و لكنها تجبرنى على الهدوء..تجبرنى بروعتها..تمس قلبى برفق.. ألقاها تاره حزينه تعتصر قلبى..تضيق من سعه نفسى ..و تارة اخرى حالمه تجعل ذكرياتى تنساب الى عقلى..تعقبها احلامى .. اتذكر معها من احب..من اشتاق اليه..اشعر بأن ركام الحياه انفض من على قلبى..اشعر بأن الهواء الذى اتنشقه طهر من التراب..اشعر ان اذنى خلت من الضوضاء..فأقم من مجلسى منتشيه لأنسل خارج المكان برفق بعدما اترك رساله قصيرة اعتذر فيها عن تغيبى و اشكره على ما صنع بى..و ارحل بدون ان اراه..كما عهدت..و بضغطة زر انتقل من عالمه النقى الى عالمنا ...و لكنى اظل اذكر عنوانه
http://charisma-90.blogspot.com/
.....................................................................

يااااه

عندى عادة من 5 سنين كده..انى كل فترة اطلع الاجندة بتاعتى و اكتب فيها اخر اخبارى..و غالبا المرات الى بكتب فيها دى ببقى المرات اللى ببقى متضايقه فيها..او المرات الى ببقى بهرب فيها من المذاكرة..يمكن من ساعة ما فتحت البلوجات و انا نادرا ما بكتب فيها..غير الاجندة; انا بجمع كل حاجة بتفكرنى بحدث معين..بجمع مناديل المطاعم لما بنخرج انا و صحابى و بكتب فى ضهرها اللى حصل يومها..بشيل قلم خدته من حد عزيز عليا..كروت اعياد ميلادى..شعرى لما قصيته..رسمة رسمتها بالجاف وسط المذاكرة..ورقه ضربت عليها من قطقوطى..كده

من يومين كنت جايبه جاز قلت اما اشوف الاجندة دى..و قعدت قريت فيها كل حاجة ..اكتشفت انى انا فعلا ماعنديش لغه تحاور..عمرى ماعرفت اقول لحد انا متضايقه..كل مرة اجرى على الاجندة..انا فاكرة انى مرة و انا صغيرة كان نفسى ابعت جواب لماما اعرفها انى زعلانة منها فى حاجة..للعلم ان ماما كانت فى الاوضه التانيه..من ساعتها نويت ان زؤلوت و حبيبه ولادى ان شاء الله هسيبلهم صندوق ازاز يسيبوا فيه اى حاجة عاوزين يعرفهولى بس مش عارفين..اكتشفت برضه معنى كلمة فترة المراهقه.اللى كل يومين بتعجب بحد جديد و تحس ان حياتك هتقف لو هو حصلوا حاجة..

الغريب انى كل ماكنت بقرا حاجة تزعل كنت بعيط مع ان فات عليها زمن..يمكن عشان كانت حبكة معايا كآبه

مش عارفه انا ليه بحكيلكوا الكلام ده..بس اهى فضفضة و السلام
..........................................
انا اسفه عن الانقطاع الى حصل..بس ده كان لاسباب نتاويه..النت كان فاصل عندى بقالوا اسبوع

آخر الاخبار

1-بالنسبه للصيدليه بعد ماكنت لقيت حد فيها كان لذيذ و بيساعدنى فى كل حاجة عشان هو مش بيحب يتنح على اللى بيتدربوا جديد زى ماكان زمان الدكاترة بيتنحوا عليه...بس غالبا البنى ادم لازم كل حاجة يعملها تكون عشان يحقق مصلحة...او غالبا ما ينفعش يبقوا اتنين اصحاب او زمايل او اخوات..لازم يكونوا حبايب..يا سبحان الله..الجميل انك لما توهمه انك مش نافع..مخطوب..او مش ناوى دلوقتى..او اى حجة و السلام..حتى لو بأسلوب مش مباشر عشان ماتحرجهوش..تلاقى المعامله اتبدلت 180 درجة..بتتعامل كأنك كرسى موجود على الجنب..الروشته دى ناقصه ركزى شويه يا "دكتورة" مش نافع كده..التهريج ده ماينفعش..و تلاقيه بينط مع اى واحده تانيه..فتحمد ربنا انك عرفت معدنه من بدرى.. ده حتى ما ينفعش تعامله على انه "زميل"..الحمد لله

2-انا دلوقتى بروح "جيم"..مع اصحابى..بجد اللى بيحصل فينا ده افترا..الجميل ان المدربه اصلا جسمها وحش..و بتوصف الحركات "نظرى" عشان هى ماتقدرش تعملها "عملى"..و الجميل انها مافيش على لسانها غير..ايه الدلع ده..ده انا مش عاوزة اشد عليكم...اللذيذ ان احنا كل واحده فينا انا و صحابى وصلنا لمرحله ماقدرناش نبطل ضحك فيها..و احنا اصلا مافيش حاجة تضحك..والصاله كلها بتتفرج علينا واحنا واقعين على الارض من الضحك

3-واحدة كنا نعرفها و احنا فى المدرسه زمان..ومن ثانوى ماشفنهاش..عرفنا انها عملت الزايده فروحنا نزورها..و اول ماشوفتها افتكرت ايام بعيدة اوى..ذكريات انا ماكنتش عارفه انى لسه فاكراها..احساس غريب

4-كان فليه كورس جامد اوى عن "الاسعافات الأوليه"...بس فاتنى معاد التقديم و هاضطر استنى للسنة الجايه..انا اتضايقت بجد..بس يلا ماعلينا

5-بمر بحاله افلاس بشعه..مش عارفه الفلوس بتروح فين!!!

5-النتيجة قربت..ادعولى انا و قطقوطى واصحابى نجيب تقدير...ادعوا هى الدعوة بفلوس

6-عاوزة اصوم عشان رمضان قرب..و ابتديت اجوع من دلوقت..لمجرد انى نويت اصوم

7-قطقوطى واحشنى اوى...يارب بأه..كل مرة تقروا ورقه مكرمشه تقولوا يارب يتمم لكم يا ذربونة انتى و قطقوطك..سامعين ولا لأ

8-كل مرة افتح المكتبه..و أبص بملل لكا القصص الموجودة و اللى قريتها ..بس قليله هى المرات اللى بلاقلا فيها قصه جديدة اخويا جابها و انا معرفتش..بجد ساعتها بحس زى الطفله اللى لقت شيكولاته فى جيب بالطو الشتا الى فات..اسيبكوا و اروح اقراها بأه

يمكن

الله اكير الله اكبر ادان الفجر ااه انا مش قادرة..طب لما يخلص ادان..الحق انام الدقيقه دى هممم الادان خلص قومى يا ذربونة بأه مش معقول المرة اللى تصحى على الادان ماتصليش..و بعدين انتى اصلا عطشانه قومى اشربى و صلى
و اقوم اصلى و انا مش عاوزة افتح عينى اوى عشان النوم مايروحش منها
و اشرب وادخل عشان انام
و فجأه
"يمكن كلمة واحده تنهى كل الحكايه..يمكن لحظة واحده تبقى فيها مش معايا..هبقى فى بلاد بعيده وانتى فى بلاد بعيدة ينزل ستار ما بينا على كلمة النهايه"
ايه اللى فكرنى بالأغنيه دى..
نامى يا ذربونة و استهدى بالله..
ايوة هتنامى اهو
و تانى "محتاجلك ايوة عارف وانتى فرحة سنينى..لو سهل تسيبى قلبى مش اسهل تفهمينى؟؟..هبقى فى بلاد بعيدة وانتى فى بلاد بعيدة ينزل ستار مابينا على كلمة النهايه..يمكن كلمة واحدة.."
باااااااااس..ايه الاغنيه الكئيبة دى اصلا..اخرسى بأه و نامى..
"اعوذ بالله من الشيطان الرجيم"
طب يا ذربونة ما تختمى الصلاه..يمكن تنامى بعدها
"سبحان الله و بحمده سبحان الله العظييم..سبحان الله و بحمده سبحان الله العظيم" ايه يابنتى التخلف اللى انتى فيه ده..يا بنتى ختم الصلاه بيبقى سبحان الله و الحمد لله و الله اكبر لما انتى مش عارفه تركزى كده ماتنامى بأه
و . . . . .
"يمكن كلمة واحده تنهى كل الحكايه.."
باااااااااااااااااااااس حبكة معاكى غنى يعنى..ماشى..انا هعرفك يعنى ايه غنى..
"قوم يا مصرى مصر دايما بتناديلك..قوم و (بلا بلا بلا) مصر دين واجب عليك"
غنى بأه ياختى اوى مادام صوتك عجبك
لو مش عاجبك الاغنيه اتخمدى و نامى بأه
خلاص هنام اهو
. . . . . .
"يمك ..." والله لو كملتيها لأخليكى تقومى تخبطى راسك فى اقرب حيطة...
اتخمدىىىىىىىىىىىىىىىى و نااااااامىىىىىى

انتى امثالك مالهمش نوم اصلا قومى يا ست ذربونة اقرى اى كتاااب
هممم كتاب ايه ده
"اشهر و اغرب الحوادث"
قشطة..عشان ما يجيلكيش نفس تغنى بعدها اصلا
"لم تكن ام الطفل منصور و هى تنتظره فى الشباك تعلم انها لن تراه مرة اخرى ..الخ الخ الخ"
لسه مش كابس عليكى النوم
خلاص اقرى اللى بعده
"كانت اغرب حادثه حققت فيها..و كان المتهم(عفريت) .. الخ الخ الخ"
ايوه عنيكى بدأت تقفل اهى..ايوه السطور ما بقيتش ثابته..ايوة هو ده النوم يا عزيزتى ذربونة
الحمد لله
خخخخخخخخخخخخخخخخخ

و....
"بمكن كلمة واحده تنهى كل ...."
حسبى الله و نعم الوكيييييييييييل النور طلع يا شيخة اصحى

مخنوووقه

من يومين ماما كلمتلى صيدلى تعرفه معرفه سطحيه كده عشان اتدرب عنده..و الصراحة انا كنت متحمسه جدا..مش عارفه ليه...يمكن عشان كان نفسى احس ان الكليه بتاعتنا دى و السنين اللى عدت و هتعدى دول ليهم لازمة..بس صراحة انا احبطت..هتقولوا ليه..هقولكم يمكن العيب فيا..انا رحت لقيت كل اللى بيتدربوا هناك اكبر منى بمراحل .. يا أما مخلصين كليه يا أما فاضلهم سنه...كده يعنى..و انا لسه فاضلى 3 سنين..هتقولوا طب و فيها ايه..هقولكم انى حسيت ان الفرق كبير اوى..منهم واحده بتعدى على الادويه بعينيها كده تقولك كل دوا بتاع ايه..بعيدا طبعا عن ان الصيدليه كبييييرة..رفوفها عاليه..و مليانه ادويه..و اللذيذ ان الدكتور مصمم ان الواحد لازم يكتب اسم كل دوا عنده فى اجنده..عشان يتعود على اسامى الادويه..طب اقولكم على حاجة..انا قعدت اكتب رف ادويه و بعد ما خلصتوا اتلخبطت و عدته من الاول تانى..و ماخدتش بالى ان الاسامى دى عدت عليا غير بعد فترة..قلت ماشى..كله بالخبرة هيجى..استحملى يا ذربونة..بس الصراحة انا استحملت كل حاجة غير الاستهبال..واحدة من الى بيتدربوا غالبا قريبه الدكتور..فأى روشته تيجى على الصيدليه تلاقيها نطت خطفتها..و الدكتور فتحة بؤه تعدى طيارة..احنا اصلا 6 بيتدربوا..و قول يعنى الصيدليه بيعدى عليها كام روشته فى الشفت الواحد..ما يلفوناش كلنا مرة حتى..انا اكتئبت..مش شايفه انى لما اكتب اسامى الادويه هعرف بعد كده هى بتعمل ايه..ده انا ممكن اخلص الاجازة كلها و ماخلصش الادويه كلها..اول مرة اسعى انا انى اعمل حاجة ليها لازمة فى الاجازة..بس غالبا طلع مالهاش لازمة
انا مخنووووووقه اوى اوى اوى

مش بفهم فى اللبس

زماان ..كان الراجل يلبس البدله و الطربوش..وكان لو مشى قالع الطربوش تبقى عيبه فى حقه..ده ولا كأنه ماشى بلبووس..بعدها قامت الثورة..و اتقلعت الطرابيش..و مابقاش يتقال عليهم افنديه..و فضل اللبس يتطور او يتدهور..الله اعلم..و فى العصر اللى احنا فيه ده بأه الغالب الجينز و ال تى شيرت..و مالوا..ما يضرش..و بعدين جت فتره الممثلين الشباب كانوا بيطلعوا لابسين زى تى شيرت كتان و فتحته سبعه و متطرز على الكم و الرقبه..انا لحد دلوقتى مقتنعه ان دى بلوزه بناتى مش ولادى..بس قلت عادى..انتى يا بنتى اللى مش بتفهمى فى اللبس..انتى ايش دراكى..
المصيبه بأه انى بقالى يومين بشوف شباب لابسين..لابسين قميص ساتاان..و ياريته اسود بس..انا بشوف ولاد لابسين قميص ساتان بنفسجى و موف..يا ترى انا برضه اللى مش بفهم فى اللبس ..ولا فيه حاجة غلط

شخبطة سودا

حاجة بايخة اوى انك بعد ماتلاقى صديق فجأه يختفى..مش القصد يختفى من حياتك..لان انتوا اصلا كنتوا واصلين لمرحله ان انتوا صحاب جدا و فاهمين بعض حتى لو بقالكوا شهر ماتكلمتوش..لكن القصد انه يختفى من حياته هو..تلاقيه فجأه دخل صندوق ازاز..و تبص انت للازاز و تقول اهو مرحله و هتعدى و مادام أزاز فهفضل شايفه و حاسس بيه لحد مايطلع من المود ده..و فجأه تلاقيه طلع قلم من جيبه ..قلم اسود..و قعد يشخبط على جدران الأزاز ..يشخبط يشخبط و كل مايشخبط يقل النور اللى داخل للصندوق و تبتدى انت ماتعرفش تشوفه..فتمد ايدك بسرعه تمسح من الشخبطه دى ..ترجع للأزاز لونه..تلاقيه سرّع هو فى الشخبطة فكل ماتمسح خط يرسم بداله خطين..و يفضل يشخبط يشخبط لحد مايتبقاش غير "بقعه" شفافة واحده فى الازاز.. و يفضل هو يبص للون الاسود من حواليه و حبه بحبه تلاقى بياض عينيه بيسود فتناديه بصوت عالى تلاقي الازاز بيرجعلك صوتك اضعف فتشاورله امسح الشخبطه دى..يمد ايده و يمسح خط او اتنين و بعدين يبص لباقى الجدار الاسود و يشاورلك"مافيش فايده" فتشاورله اطلع بره الصندوق يبصلك ..يقولك الصندوق بابه ضيق.. فتمد ايدك تكسر الصندوق ده..و تجرى تساعده يطلع..يبصلك و يقولك انا بقيت كويس.. تصدقه و تستنى معاه و تقول هيرجع مع الايام زى الاول..و مهما عدت ايام تلاقي بياض عينه لسه مارجعش..تقوله وانت مش عارف تعمل ايه"مالك"..يقولك الكلمه اللى خدها جدار"انا كويس".لما انت كويس ليه كلامك كله بأه شخبطة سودا..ليه بصتك للدنيا بأه من البقعه الشفافه الوحيده اللى كانت فى صندوقك..ليه مامدتش ايدك تمسح الشخبطة من حياتك..الشخبطة اللى معظمها رسمته بأيدك..رسمته لما لقيت الدنيا رسمتلك شخبوطة واحدة..شخبوطة واحده و انت كملت عليها..ليه ماكسرتش صندوقك من جوه..ليه سبتنى اكسره و انت عارف ان الصندوق ده لازم يتكسر من جوا.. لازم يتكسر بأيدك..و انت عارف انى مهما كسرت هتفضل تعمل لنفسك صناديق اصغر..اطلع بأه ..امسح الشخبطة دى من على عنيك..امسحها من على قلبك..هتلاقى البقعه الشفافه دى كبرت كبرت..هتلاقيك بتبص لدنيتك من باب كبير ابي بدل الخرم اللى عمال تضيقه ده..ارجع بأه زى زمان
.......................................................

و الله ما شايفه حاجة

حاجة غريبه اوى
انا بحب اصحابى جدا . . و مع كده بقالهم فترة يقولولى انتى اتغيرتى..بأيتى تحطى قطقوطك فى حسابك قبلينا

انا بحب قطقوطى جدا . . و مع كده بقالوا فترة يقولى انتى اتغيرتى..بأيت اخر حد يجى على بالك

انا بحب ماما و بابا جدا . . و مع كده بقالهم سنين يقولوا انتى اتغيرتى..بأه البيت اخر حاجة تيجى فى بالك

قعدت افلى نفسى و لا مؤاخذة فى اللفظ . . افتكر كل حاجة كنت بعملها مع كل حد فيهم ..و ادور انا غيرت ايه بالضبط..فضلت ابحلق فى كل تصرف بعمله دلوقتى..بس والله ما شايفه حاجة..والله ماتغيرت..و الله لسه بحب قطقوطى اوى ..والله لسه بحب اصحابى اوى . . والله لسه بحب اهل بيتى اوى اوى

......................
ملحوظة:لسه النهارده واحده من اصحابى متضايقه منى و بتقولى.."هتفضلى طول عمرك كده ما بتفكريش تتصلى بحد..(عمرك ما هتتغيرى ابدا)"!!!!!

عايزة اخرج

وانا صغيرة _من زماااااااااان_ كان نفسى اكون ولد مش بنت خصوصا انى بنت على 3 ولاد...كنت بستغرب مبدأ بابا و ماما اوى و استغربت اكتر ان كل الناس كده كلهم يقولولك "لا البنت ماتنزلش الشارع عشان ممكن تتعاكس" و فى نفس الوقت يسيبوا ولادهم اللى هم اصلا بيعاكسوا يخرجوا عادى!!..طب ما الاسهل يمنعوا الولاد من الخروج و بالتالى نخرج احنا البنات براحتنا و بعدها بأه يخافوا على الولاد ليتعاكسوا ..و لما فاجئت اللى اكبر منى بالفكرة البنائه دى رفضوها رفض تام مش عارفه ليه و قال حاولوا يقنعونى بطريقه تانيه فقالوا"الولد لازم يتمتع بحياته لأن بعد كده هيتجوز و يعول اسرة و يشتغل و يشقى " .. قال يعنى هو هيتجوز لوحده..ماهو اكيد هيتجوز واحدة بنت..وقال يعنى بيشتغل لوحده .. ماهى اكيد هتشتغل معاه . . و هتعول معاه نفس الاسرة اللى هم الاتنين اصلا هيشتركوا عشان يكونوها اساسا..الغريب ان هم لحد دلوقتى مش مقتنعين بكلامى...عموما بكره يجى اليوم اللى هيبقى الولاد فيه من الشغل على البيت عدل و البنات تخرج بالليل براحتها
. . بس.
................
ذربونة هانم

اول سطر

طول عمرى كان نفسى ابقى عايشه فى بلد على البحر..عشان لما اتضايق اجرى للبحر..مش عشان اشكي له..بس عشان ده المكان الوحيد اللى بحس انى لوحدى يه..انى ممكن اصرخ من غير ما أتكسف..وبعدين لقيت ان اسهل من انى اجيب البحر لحد بيتنا,انى اكتب كل اللى نفسى اصرخ بيه.فى الاول كنت بكتب على ورق و بعد ما اخلص كتابه اكرمشه و ارميه..و بعدين بقيت اكتب فى اجندة عشان لما اكبر اراعى الحاجات اللى كانت بتضايقنى و انا صغيرة مع عيالى..بس الصراحة يطلت اكتب فى الاجندة عشان ممكن اى حد من الى اعرفه يقراها..فلقيت الحل الوحيد انى اكتب فى بلوج محدش يعرفنى فيه..الصراحة ده تانى بلوج ليا..الاولانى بكتب فيه انا و اصحابى و مكل القراء عارفينى شخصيا سواء من الكليه او من قرايبى او من الايميل..او من اصحابى نفسهم اللى بيكتبوا معايا.فقررت اعمل بلوج تانى ليا لوحدى محدش يعرفنى فيه..و عملت "ورق مكرمش"
رغيت كتير انا عارفه..بس فى الاخر احب اقول انى مقدرش اوعدكم ان البلوج ده يعجبكم..لأن من الاخر انا بكتب فيه عشان خاطرى مش عشان خاطركم
بس