حاجة بايخة اوى انك بعد ماتلاقى صديق فجأه يختفى..مش القصد يختفى من حياتك..لان انتوا اصلا كنتوا واصلين لمرحله ان انتوا صحاب جدا و فاهمين بعض حتى لو بقالكوا شهر ماتكلمتوش..لكن القصد انه يختفى من حياته هو..تلاقيه فجأه دخل صندوق ازاز..و تبص انت للازاز و تقول اهو مرحله و هتعدى و مادام أزاز فهفضل شايفه و حاسس بيه لحد مايطلع من المود ده..و فجأه تلاقيه طلع قلم من جيبه ..قلم اسود..و قعد يشخبط على جدران الأزاز ..يشخبط يشخبط و كل مايشخبط يقل النور اللى داخل للصندوق و تبتدى انت ماتعرفش تشوفه..فتمد ايدك بسرعه تمسح من الشخبطه دى ..ترجع للأزاز لونه..تلاقيه سرّع هو فى الشخبطة فكل ماتمسح خط يرسم بداله خطين..و يفضل يشخبط يشخبط لحد مايتبقاش غير "بقعه" شفافة واحده فى الازاز.. و يفضل هو يبص للون الاسود من حواليه و حبه بحبه تلاقى بياض عينيه بيسود فتناديه بصوت عالى تلاقي الازاز بيرجعلك صوتك اضعف فتشاورله امسح الشخبطه دى..يمد ايده و يمسح خط او اتنين و بعدين يبص لباقى الجدار الاسود و يشاورلك"مافيش فايده" فتشاورله اطلع بره الصندوق يبصلك ..يقولك الصندوق بابه ضيق.. فتمد ايدك تكسر الصندوق ده..و تجرى تساعده يطلع..يبصلك و يقولك انا بقيت كويس.. تصدقه و تستنى معاه و تقول هيرجع مع الايام زى الاول..و مهما عدت ايام تلاقي بياض عينه لسه مارجعش..تقوله وانت مش عارف تعمل ايه"مالك"..يقولك الكلمه اللى خدها جدار"انا كويس".لما انت كويس ليه كلامك كله بأه شخبطة سودا..ليه بصتك للدنيا بأه من البقعه الشفافه الوحيده اللى كانت فى صندوقك..ليه مامدتش ايدك تمسح الشخبطة من حياتك..الشخبطة اللى معظمها رسمته بأيدك..رسمته لما لقيت الدنيا رسمتلك شخبوطة واحدة..شخبوطة واحده و انت كملت عليها..ليه ماكسرتش صندوقك من جوه..ليه سبتنى اكسره و انت عارف ان الصندوق ده لازم يتكسر من جوا.. لازم يتكسر بأيدك..و انت عارف انى مهما كسرت هتفضل تعمل لنفسك صناديق اصغر..اطلع بأه ..امسح الشخبطة دى من على عنيك..امسحها من على قلبك..هتلاقى البقعه الشفافه دى كبرت كبرت..هتلاقيك بتبص لدنيتك من باب كبير ابي بدل الخرم اللى عمال تضيقه ده..ارجع بأه زى زمان
.......................................................
.......................................................
هناك 18 تعليقًا:
الله يا زربونة جميلة أوي
بجد أنا حساتها أوي والله مش مجاملة
بجد بجد جمييييييييييييييلة
دمتي مبدعه
يمكن بجد انا اكتر واحد ممكن يفهم الموضوع ده
مش عشان (ليكوريكا) طول عمره عبقي
لا لا لا
الموضوع غير كده خالص
الموضوع وما فيه اني مريت بالتجربه اكتر من مره
وساعات كتير ببقي انا جوه الصندوق للاسف :(
ساعات كتير الانسان بيوصل لمرحله انه بيفقد الثقه في كل اللي حواليه ، فبيحاول يحط نفسه في صندوق زي اللي انتي بتحكي عنه ده
وبيحاول يبعد نفسه عن كل الناس
حتي كلمة (مالك) بتسببله الممم شديد جدا
لان في حاجات كتير مينفعش تتحكي الو تتوصف
فبيبتدي شخبط يشخبط عشان محدش يشوفه
وبيغمض عنيه للابد
بيتخنق وبيتعب لما يلاقي حاته من سيء لأسواء
بيحاول يخرج ويراجع نفسه
لكن للاسف زي مفقد الثقه في اللي حواليه
بيلاقي انه فقد حتي الثقه فنفسه
متلوميهوش انه اتغير ... ومتفكريش ليه هوا مكسرش الصندوق من جوا
حاولي تكوني معاه وتمديله ايدك وتساعديه من غير اسئله
وجايز يرجع زي الاول مع انه صعب جدا :(
ليكوريكا
ايه قصه الصداقه النهارده فى المدونات لا كده كتير
امممم بس طريقتك حلوة
مش عارفة
ساعات الواحد بيحب يعيش في الصندوق
بينعزل عن الواقع
ويفضل يشخبط لحد ما هوه بيفقد الامل
بس انو يلاقي حد تاني يقولوا يطلع
اعتقد دة يدية دافع
إلا لو كان فاقد الامل تماما في الخروج
فية ناس عندها فوبيا الخروج
صعب قوي الصندوق
و الاصعب اللي برة الصندوق
و الأكثر صعوبة اللي جوة الصندوق
دمتي سالمة
اسلوبك وتشبيهك جميل
وانا بامر حالياً فى طور الإزاز
بس مش ناوى اشخبط
معاكى قلم جاف
يا بنتى حرام عليكى
ليه قولتى اللى جوايا
ليه اكلمتى عن صندوقى
عارفه يا ذربونه
انتى اكلمتى عن صندوقى اللى اخترته ليا
بس انا ملييش اصحاب يكسروه
لسه زى مهو
خلتينى اروح اشوف سواد شخبطتى فى المراية
بجد
لو كان ليا اللى يكسرلى صندوقى
يمكن كنت مسحت الشخبطه
لكن المشكلة
انو اللى موجود بيزودها
كلامك حلو قوى قوى قوى
ومعلش بعبعت بالكلام عندك
سلامى
معلش عايزة اعقب على كلام ليكوريكا
الشخص اللى بيكون فى الحاله دى
صدقنى
اينعم بيحاول يختفى عن كل الناس
بس بيحتاج ايد بتحبه بجد تتمدله
اة مش هيرد يقول اللى جواه
اة كلمة مالك هتبقى تقيله عليه
بس بيحتاج قوى الشخص اللى قريب ليه ده يكون جمبه قوى ويساعده حتى بدون ميسأله
لان الشخص ده هو اللى هيرجعله ثقته بنفسه من تانى قبل ميرجعله ثقته بغيرو
لان بردو اللى ضيع الثقه دى شخص تانى
وعلى فكرة
مش ممكن يرجع زى الاول
لكن بقوته ممكن يرجع احسن بكتيييييييييير
معلش يا ذربونه
اعذرينى يعنى انى رديت على زباينك :D
سلامى
حلو اسلوب التعبير دا
تحياتى
حلو أوي عرضك للأمر بالصورة دي
ساعات الوحد غصب عنه بيحبس نفسه جوا الصندوق ده
هوا مش عاوز كده
بس بتحكم معاه
أنا كمان مريت بالمرحلة دي لفترة لا بأس بها
ومانكرش انها كانت قاسيه أوي
ومانتش قادرة أساعد نفسي
ومش قادة أسمح لحد يساعدني
ومازالت بعض آثار الزجاج معلمّه في ايد ي
أنا كسرت الزجاج من نفسي
ومن جوه
بس كنت محتاجه وقت أرتاح قبل الخطوة دي
كنت خائرة القوي .. نمت .. كتير أوي
ولما صحيت كنت استعدت بعض العزيمة
ومع الوقت الحمد لله كل شئ بقي كويس
مش تمام أوي يعني .. بس احنا كنا فين ؟؟ الحمد لله ..
آسفه لو طولت عليكي
بس عاوزة أقولك أنه مش سهل الواحد وهوا جوة الازمة يساعد نفسه يخرج منها
او يسيب حد يساعده
الأمر محتاج بعض الوقت
ممكن المسانده بس تفيد أكتر أثنء الأزمة دي
تحياتي ودمتِ بخير
lyssandra
eman
ربنا يخليكى يا جميله
انا والله ما مبدعة ولا نيله بس انا وصفت حاجة شفتها و حسيتها
ليكوريكا
انت وجعتنى بكلامك
احبطتنى
حسبى الله ونعم الوكيل
appy
كلكو عليااا ولا ايه
:)
نعكشه
والله بره الصندوووق احلى كتييير
كفايه انه منور..وجوه ضلمة بتخنق
ميرسي لمرورك يا جميله
oss
هحدفك بطوبه دلوقتى تكسر الازاز و تيجى فى راسك تعورك
بأه انا عاوزة اطلع حد من الصندوق تيجى انت تقولى انا دااااخل
حسبى الله و نعم الوكيل فيكم
عيله مفتريه
هقولك حاجة
انا كنت جوا الصندوق ده من فترة
و كنت شاده مع اصحابى جامد فمكنش فيه حد بره ينادينى
عارفه عملت ايه
انا جبت حاجة ووقفتها برة عشان افضل ابص عليها وقول انا لازم اطلع عشانها
الحاجة دى هى البلوج ده
فاعملى انتى لنفسك حاجة تخرجك من الصندووق
عيله مفتريه
تعقيبك عجبنى
رفع من نفسوياتى
و يا جميله انتى تردى على اى حد
الكشكول كشكولك
blue wave
شكرا لحضرتك يافندم
lyssandra
كلامك موزون بجد
و الحمد لله انك كسرتيه
بس المشكله ان الوقت ده صعب تحددى هو اد ايه
إرسال تعليق