الاثنين، 25 أغسطس، 2008

سرقت اسبوع مطروحى قبل رمضان



"ماتزوقينى يا ماما .. اوام يا ماما ..ماتزوقينى يا ماما .. اوام يا ماما.. ده عريسى هياخدنى بالسلامه يا ماما"
فضلت الاغنيه دى تتردد على لسان بنت خالتى..اللى معداش سنها ال 8 سنوات و معداش طولها ال 80 سم..و لما اقول تتردد فأنا اقصد انها بتردد على مدار اليوم لمده اسبوع كامل قضيته فى مرسى مطروح عند خالتى..و طبعا يصاحب الاغنيه حركات لولبيه اخدتها رمز للمياصه و البنوته"بفتح الواو"..و فضلت انا بضلين..ضل مسببه النور..و ضل آدمى اسمه "سهيله"...لحد ما بقيت ادعى ان عريس الغفله ده ييجى اوام فعلا و ياخدها من على ودانى..و فى وسط مانا بدعى ربنا ان العريس ده ييجى او ان سهيله يجيلها زغطة..سمعت "كريم"_و هو نسخه قزمة من (الضيف احمد)_بيسأل مصطفى اخويا"أبيه مصطفى..هو السندوتش فى مؤمن بكام" و يرد مصطفى " يعنى يا كركر حوالى عشرين جنيه ولا حاجة"و هنا يبدأ كوكو عادته فى تضخيم الارقام مجرد ما يسمع رقم و يرد"عشرين جنيه..همممم..اه..و ممكن بميت جنيه..بخمسميت جنيه..بألف جنيه..بخمسميه و خمسن الف جنيه....." و يسكت غالبا لأن الارقام اللى عرفها خلصت..و يفضل يفكر فى سعر جديد لسندوتش مؤمن و نفضل احنا مستنين بخباثه الرقم الجديد..و فجأه يفتح بؤه "بشلن" و هنا نقع كلنا على الارض من الضحك بما فينا كريم نفسه..و ييجى اخوهم الاكبر محمد و يقوله"و الله كنت طيب يا كريم" ودى البديل المخفى لجمله "ربنا يكملك بعقلك يا كريم"...و بعد طول انتظار الاقى الموبايل اللى مبيفارقش ليدى بيترعش فأقوم اجرى على البلكونه..قلبى سابقنى على هناك اصلا و هو بيشد الموبايل من ايدى..و اسمع احلى الو من أحن "سمسم" فى الدنيا

هناك 27 تعليقًا:

Oss يقول...

حمدالله عالسلامه
بس بردو ماكانش ينفع
تبعينا علشان مطروح
:(
سايبانا كده من غير لا خبر ولا يحزنون
ماكانش العشم
:)
عموماً لو كنت مكانك كنت بعت بردو
حمدالله عالسلامه

blue-wave يقول...

ماشى
الناس اللى لحقت تصيف دى
يا بختك
ويابختك ب سهيله وكركر:))
واحن سمسم( وش بيغمز)

كيارا يقول...

والله برافوا عليكي الدور والباقي علي اللي قاعده وسط الابحاث والمعاهدات
اه ياني من القرايه ياني


انا مش بحسد انا بقر

:))

عيله مفتريه سابقا يقول...

عارفه
من كل ده
عايزة اقولك ربنا يخليلك سمسم

مش حسد ده حقد

نياهااااااااااااا

لالا بجد
رمضان كريم
ليكى ولسمسم

سلامى

شملولي بن سحلولي يقول...

حمدلله علي السلامة

عروسة ننوسة يقول...

كل سنة وانتى طيبة

أحمد المصري يقول...

كل سنة و انتي طيبة و إن شاء الله يبقى رمضان كويس علينا.

ذربونة هانم يقول...

oss
انا عارفه والله انى استندلت
بس دى مطروح..حتى لو مش مطروح..دى اى مكان غير هنا

معلش يا اسامة بأه:)

الله يسلمك..و كل سنة و انت طيب

ذربونة هانم يقول...

blue wave
ههههه
ممكن تاخد سهيله و كركر لو عاوز

بس سهيله و كركر بس (وش بيغمز برضه)

ذربونة هانم يقول...

كيارا
يا شيخة حتى لو بتحسدى
مقبوله منك يا جمييل
كل سنة و انتى طيبه

ذربونة هانم يقول...

عيله مفترية سابقا
النهاردة خمسه شهر 5 سنه 55555
:)
كل سنة و انتى طيبه..يا مفتريه :)

ذربونة هانم يقول...

شملولى ابن سحلولى
الله يسلمك
و رمضان كريم

ذربونة هانم يقول...

عروسة ننوسه
و انتى طيبه يا جميييل
منورة البلوج

ذربونة هانم يقول...

احمد المصرى
البلوج نور بجد
و الورق اتفرد ما بقاش مكرمش
:)
كل سنة و انت طيب

Mohamed Dawod يقول...

كل سنه وانتى طيبه يا دكتوره ذربونه... الأول شكرا انك جبرتى بخاطرى وخدتى التاج اللى سبته لك قبل أجازتى....ثانيا يارب يكون المود الوحش راح راح وانتهى....ثالثا بنت خالتك مغلطتش مطروح أرض الرومانسيه وبتثير فى خيال كل البنات الذكريات والاحلام الرومانسيه وفوارس الأحلام من أول تانيه ابتدائى لحد تانيه كلية صيدله...رابعا رمضان كريم....خامسا سلام عليكم

نهر الحب يقول...

أسأل الله الذي لن تطيب الدنيا إلا بذكره
ولن تطيب الآخرة إلا بعفوه
ولن تطيب الجنة إلا برؤيته
أن يديم ثباتك ويقوي إيمانك وصحتك
ويرفع قدرك ويشرح صدرك
ويسهل خطاك لدروب الجنة
وأن يجعلك من عتقائه من النار
ومبروك عليك شهر رمضان

Eman يقول...

كل سنة وانتي طيبة يا ذربونة
ايه الغيبة دي كلها
ما عالينا ، رمضان كرييييييييييييييم

Eman يقول...
أزال المؤلف هذا التعليق.
ا.ح يقول...

بسم الله الرحمن الرحيم
السلام عليكم ورحمة الله وبركاته

بجد اول طلة ليا على مدونتك و شكلها ان شاء الله مش هتكون الاخيرة
ماشاء الله جميلة وواسعة هههههههههه ايجار جديد دي؟
بس بجد بقى حسيتك لذيذة قوي و تلقائيتك عسولة خالص
صحيح انتي منين؟ (على الصورة اللي اخوكي ماشاء الله واخدة تحفة تسلم ايده)
صحيح هو العريس ده كان عريس مين بالظبط؟
و بعدين انتي قلبتي الاسبوع في كلمتين؟ مينفعش كدة
بجد سعيدة جدا اني جيت هنا

Oss يقول...

طق طق طق
دستور يا اهل البلوج

ذربونه هانم هنا ؟؟

ذربوووووووووووووووونه
انت فين؟
:((

كأنني أنا يقول...

ههههههههههه

تدوينة جميلة أوي بجد
دي أول مرة أجي هنا .. بس اتبسطت جدا
وهاجي كتير بعد اذنك :)
الحمد لله على سلامتك يا حبيبتي

كيارا يقول...

انتي فييييييييييييييييييييين يابت

رحتي فين

Mohamed Dawod يقول...

هو انتى اختفينى فين؟ شكلك معتكفه فى مسجد.....عوما شكرا على السلام السريع.....فى انتظار جديدك دايما يا دكتوره

Eman يقول...

الغيبة الاولي بسبب الاسبوع المطروحي
طيب التانية؟؟

ولا انشغلتي بالكتابة في مكان تاني ونسيتي ورق مكرمش ;) ؟

واحدة مفروسة يقول...

زربونة هانم
انتى فين؟؟
غيبتك طولت
قلنا رمضان و العيد و ال 6 ايام البيض
و لسة مش ظهرتى
لعل المانع خير
عاوزة اجازه خدي براحتك
بس ادخلى قولى انك اجازة
لكي يطمأن قلبنا

واحدة مفروسة يقول...

زربونة هانم
انتى فين
اوعي تكوني اكلتي كحك كتير كتم على نفسك
ههههههههههههههههه
يارب تكوني بخير
طمنينا طيب عليكي بس

نهر الحب يقول...

عيد سعيد
وكل عيد اضحى وانت بخير
وان شاء الله العام القادم على عرفات متجمعين
عيد سعيد يارب العالمين