الاثنين، 28 يوليو 2008

خايفه(تحديث)



يارب انا خايفه أيأس من رحمتك..خايفه بجد
مش عارفه الغلط فين..من كام سنه فضلت ادعى فى كل ركعه و كل سجدة..بين الادان و الاقامه..اول مابفطر فى رمضان..وانا فى زياره المريض..فضلت ادعى فى كل وقت قالولى فيه الدعاء مستجاب.. ان احمد يخف من السرطان..و ربنا ماكتبلوش الشفا.. و مات قلت اكيد فى رحمة انا ماعرفهاش..اكيد ربنا كده بيبتلى عمتى عشان يغفرلها؟؟اكيد ربنا بيرحمنا كلنا ..بعدها دعيت لجدو يخف..دعيتله فى كل وقت..دعيت و دعيت و دعيت..و جدو مات ..اكيد ربنا رحمه من الام المرض..اكيدفى حكمة..بعدها دعيت ..بس المرة دى كان فلا ايدى كمان غير انى ادعى..فذاكرت انا و اسلام ..لازم ينجح عشان موضوعنا يكمل..ماكنش بينام عشان يذاكر..هو اللى كان بيخلينى اراجع الماده بعد ما اخلصها لما كنت ااشوفه بيراجعها..قاللى يارب اجيب مقبول قلتله ان شاء الله تجيب جيد هو اللى كان بيعلمنى اشتغل عملى ازاى..و دعيت و دعيت و دعيت يجيب تقدير..اصله تعب....و جت النتيجة.. شايل مادتين ....ده ماكنش بيذاكرقبل كده و كان بيجيب احسن من كده و كان بيعدى..ده كان بيفتح الكتاب قبل الامتحان بيوم و بيعدى..ازاى لما يذاكر يشيل مادتين و الباقى مقبول..و طبعا باباه فى ساعتها رد"مافيش فايده فيك" .. و كفايه اوى الكلمة دى..كل المرات دى كنت بدعيلهم و مش بدعيلى..بخاف ليكون دعوتى هتستجاب فى المرة الوحيدة اللى ما دعيلهومش فيها و ادعيلى..و لما لقيتنى ببعد عن ربنا..بغلط و بتمادى فى الغلط..لما لقيتنى بيأس من رحمته..دعيت ربنا يرجعنى زى زمان..اول مرة ادعي عشانى..و ..و برضه لسه ببعد..و برضه بغلط بزيادة.و برضه اليأس بيزيد.."انا عند ظن عبدى بى" اللى ماكنتش عارفه اسكتها فى دماغى بأه صوتها يوطى فى ودانى لحد ماتخرس..يمكن دى حاجة هايفه بالنسبالكم..بس بالنسبالى دى القشه اللى قسمت ظهرى...
للدرجة دى انا ربنا ما بيحبنيش..

هناك 11 تعليقًا:

حمادة زيدان يقول...

ذربونة

ربنا رحييييييييييييييييييم أوى وبيحبنا أوى والله وعلى رغم كل اللي بنعملوا ... ربنا رحيم وغفور ... على الرغم من عدم التزامي طول الوقت بس بعدي ربنا طول الوقت ومتأكد من رحمة ربنا ومتأكد أني هيجيلي يوم وربنا هيهديني لأني بحب ربنا وحاسس أنه بيحبني وبيسترني كتير

متخافيش وثقي في رحمة ربنا

Oss يقول...

بالرغم من ان الإنسان اغبى مخلوق فى الوجود
وبرغم كتر المعاصى اللى الإنسان بيعملها
وبرغم ده كله ربنا هيفضل رحيم

وإلا ماكانش ابليس ايام سيدنا موسى طمع فى الرحمه دى بعد كل اللى عمله
وكان ممكن ربنا يسامحه ويرحمه
بس ابليس اللى غبى زينا

ربنا يرحمنا كلنا دنيا وآخره

Eman Henaish يقول...

خلي ثقتك برحمة ربنا كبيييييييييييرة

ربنا رحمن ، رحيم

ورحمته ما لهاش حدود

ده الظالم الجبار الملئ بالمعاصي لما بيرجع

لربنا وهو تائب نادم ربنا برحمته

بيتقبله وبيغفرله

يبقي أحنا يا غلابة هنيأس من رحمته؟؟؟

blue-wave يقول...

تذكرى دائما انه لا ييأس من روح الله الا القوم الظالمون
ومن خاف الله ادخله الله جناته
تحياتى

Mohamed Dawod يقول...

هو فى ايه يا ذربونه. انا بقالى كتير بعيد عن المدونات بس فوجئت بجد ببوستك النهارده. مش عارف فى ايه عندك بس مش مهم المهم أن رحمة ربنا مش ممكن نيأس منها. ماهو مينفعش. فى وسط كل المواقف الصعبه اللى فى حياتنا لازم يبقى فى طاقة تور قدامنا. النور اللى لازم يبقى قدام عنينا هى رحمة ربنا. لو فقدنا النور ده يا ذربونه حنتعب قوى اكتر من التعب الاساسى اللى احنا فيه. تعب التوهان. تأكدى أن الانسان ممكن يكون فى موقف صعب وقدام عينيه مش شايف اى أمل وسبحان الله يكون ربنا بينقله من الموقف ده لحاجه حلوه فى حياته. احنا نظرتنا محدوده قوى قوى قوى ياذربونه. اصبرى وشوفى ربنا حيقدملك ايه فى حياتك....ابقى طمنينا عليكى

ReEm يقول...

ربنا يثبتك ويثبتنا على الايمان برحمته

هي ساعت بتيجي فترات من كتر اللي

بنشوفه بنضعف و وسوسة الشيطان بتقوى

طبهعا لكن طول ما ايمانك قوي

هترجعي زي الاول واحسن كمان هي فترة

و ربك مافيش ارحم منه

Mafrousa يقول...

يا زربونة هانم
إزاي تيأسي من رحمة الله بس
فى حد يقول كده
ماتجيش يأس مع رحمة الله
ربنا جميل
وحنين
احن علينا من اهالينا
فى حد ييأس و ربنا بيطبطب عليه
قومي صليليك ركعتين و استغفري
رمضان قرب
انزلى هاتي الفانوس
سلام
ورمضان كريم

Mohamed Dawod يقول...

ذربونه ياريت تطمنينا عليكى....اتمنى ارجع ادخل تانى المدونه عندك الاقى ضحكاتك وكل المعلقين مجلجله فى المدونه. ربنا يفك كربك ويرحمنا جميعا

Mohamed Dawod يقول...

ليكى تاج/واجب عندى من فضلك تعالى خديه.....ممكن؟

Sara يقول...

انا كنت زيك والله بجد واقول نفس الجملة ربنا مبيحبنيش بس لغاية ماصحبتي ااكدتلى ان كل ده اختبارات
ربنا بيختبرك تدعي وربنا يعمل اللى فيه الخير وانت يتفتكري ان ربنا مبيستجبش في حين ان كل ده اختبار طويل شوية بيختبرك يشوفك هاتدعي تاني وتلجياله تاني ولا كل ده بتبعدي وعلى فكرة جزء من بعدك عدم رضا بقضاءه يعني كل ده طلع شيطاااااان من الاخر مش مسالة ان ربنا مبيحبكيش

ارجعي ادعي تاني وعمرك ماتقنطي من رحمة الله وارضي بقضاءه واجتازي الاختبارات دي كلها

تحياتي

reem يقول...

حبيبتي في الله :

أتيأسي من رحمة الله ... و الله هو الذي يرحمك... فالله رحمك يوم خلقك بعد أن كنتي لا شيء ...و الله رحمك عندما هداكي للإسلام و جعلكي ذات قيمة بين الناس ... والله رحمك عندما شفاكي من مرضك و عافاك ... و الله رحمك عندما رزقكي الأهل و الأصحاب ... و الله رحمك عندما أطعمكي و رواكي عندما كنتي ظمأى و عطشان ... فكيف تيأسي من رحمة الله العظيم الرحيم الخلاق ... عسى الله أن يجعل من فقدتي في أعالي الجنان إذا رجعتي و استغفرتي لله الحليم المنان .