من يومين ماما كلمتلى صيدلى تعرفه معرفه سطحيه كده عشان اتدرب عنده..و الصراحة انا كنت متحمسه جدا..مش عارفه ليه...يمكن عشان كان نفسى احس ان الكليه بتاعتنا دى و السنين اللى عدت و هتعدى دول ليهم لازمة..بس صراحة انا احبطت..هتقولوا ليه..هقولكم يمكن العيب فيا..انا رحت لقيت كل اللى بيتدربوا هناك اكبر منى بمراحل .. يا أما مخلصين كليه يا أما فاضلهم سنه...كده يعنى..و انا لسه فاضلى 3 سنين..هتقولوا طب و فيها ايه..هقولكم انى حسيت ان الفرق كبير اوى..منهم واحده بتعدى على الادويه بعينيها كده تقولك كل دوا بتاع ايه..بعيدا طبعا عن ان الصيدليه كبييييرة..رفوفها عاليه..و مليانه ادويه..و اللذيذ ان الدكتور مصمم ان الواحد لازم يكتب اسم كل دوا عنده فى اجنده..عشان يتعود على اسامى الادويه..طب اقولكم على حاجة..انا قعدت اكتب رف ادويه و بعد ما خلصتوا اتلخبطت و عدته من الاول تانى..و ماخدتش بالى ان الاسامى دى عدت عليا غير بعد فترة..قلت ماشى..كله بالخبرة هيجى..استحملى يا ذربونة..بس الصراحة انا استحملت كل حاجة غير الاستهبال..واحدة من الى بيتدربوا غالبا قريبه الدكتور..فأى روشته تيجى على الصيدليه تلاقيها نطت خطفتها..و الدكتور فتحة بؤه تعدى طيارة..احنا اصلا 6 بيتدربوا..و قول يعنى الصيدليه بيعدى عليها كام روشته فى الشفت الواحد..ما يلفوناش كلنا مرة حتى..انا اكتئبت..مش شايفه انى لما اكتب اسامى الادويه هعرف بعد كده هى بتعمل ايه..ده انا ممكن اخلص الاجازة كلها و ماخلصش الادويه كلها..اول مرة اسعى انا انى اعمل حاجة ليها لازمة فى الاجازة..بس غالبا طلع مالهاش لازمة
انا مخنووووووقه اوى اوى اوى
انا مخنووووووقه اوى اوى اوى
هناك 11 تعليقًا:
تؤ تؤ تؤ
يابنتي دنتي مبقالكيش يومين
اعرف واحدة صحبتي
اشتغلت في صيدلية
في الاول برضو مش عارفة حاجة ومش فاكرة حاجة
انتي فاكرة ان الكلية هيا اللي هتخليكي تحفظي الادوية
تؤ تؤ تؤ لا يا ماما لاااااا
هيا الخبرة في الصيدلية
اعملي زي ما بيقولك
هوه فاهم
وبعدين مش هتقدر تخطف كل الروشتات يعني
ابقي اخطفي منها يا ستي
او ما تلاقيس حد يقرب من الصيدلية نطي انتي كمان
و اهي هتبقي لعبة و تهريج
خليكي صبورة
وان شاء الله تتعلمي
ربنا يعينك وي وفقك يا قمراية
شدي حيلك
سدمتي صيدلانية
سلامون عليكي
مجرد محاولتك تعد نجاح
---
عافري أكتر
مش هنكر النسيج من أول السطر
استمري ..وشوفي الماده الفعاله ورتبيهم ف دماغك
ما تحكميش من اول يوم
استمري
وابهريهم
ربنا معاكي
الفارما بتاخدوها ف تالته حديث تقريبا
السنه الجاي هتبقي لهلوبه
سلااام
اكبر غلط اللى انتى فيه دا
اولا مجرد سماعك اسامى الأدويه دا فى حد ذاته مفيد
ثانبا كفايه انك تعرفى ايه اكثر الأدويه المتداوله
يعنى ايع اكتر ادويه بتتكتب للمغص؟ ايه اكتر للأسهال وكدا ودا هايقولوهولك اللى اكبر منك او انتى هاتسمعيها بتتردد كتير فى الصيدليه
ثالثا تقدرى كل يوم تمسكى دوا او اتنين تشوفى شكل العلبه وتقرى البانفليت من جوة وكدا هاتستفيدى
جربى وماتيأسيش بسرعه كدا
تحياتى
أنا واحده قريبتى عملت زيك
وكانوا بيكتبوها الأسامى والنشره بتاعة الدوا
سابت لهم الصيدليه ومشيت
وواحد قريبى فتح صيدليه من غير مايتدرب وشغال -ما شاء الله- زى الفل
سيبك من الكلام ده
هو أنا آه ماعرفش اصلاً هل ده مفيد
وأصلاً انا مش مؤهل للنصح
ولا عارف حاجه
بس اهو
تجربة السابقين أحسن رأى
الله معك
مخنوقة ليه بس؟؟
يا زربونة ما تيأسيش من البداية
بالعكس أكيد هتستفيدي علي الأقل
هتعرفي أسامي الأدوية والمتداولة وكدة
ودنك هتاخد عليها :)
وأسمه تغيير
شدي حيلك ... وميرسي علي ردك في كومنت
البوست اللي فات ، أنا والله اللي
بفرح لما أشوفك كاتبة بوست جديد
تحياتي
ميمفعش تكتابي
لازم تحاولي من تاني
عشان توصلي
بالتوفيق
لأ لأ لأ
لازم تستحملي
الحياة العمليه غير النظرية خااالص
لازم تاخدي خبرة فى التعامل مع نوعيات البشر المختلفه
و انتي خليكي انصح ...اللى اكبر منك دول عندهم خبرة....خديها منهم...حتقصر عليكي و توفر عليكي كتير
اساليني انا
حتى لو ماحدش عرفك حاجه...او بخل عليكي بمعلومة...على الاقل خدي خبرة التعامل مع الناس
بلاش الزربونة ديه
يابنتى مجرد وقوفك فى الصيدليه خبره بتاخديها. وأعرفى أن فى أى شغل حتروحيه حتى بعد التخرج أول شهر تقريبا بتكون العمليه ضلمه ضلمه يعنى. إستحملى وبلاش تتذربنى على قريبة الدكتور وخللى بالك من تفكير الناس اللى حواليكى. هم كمان اكيد بيقولوا يعنى البنت اللى فاضلها تلات سنين جايه تقطع علينا. سيبيلهم فرصتهم هما كمان. وربنا يوفقك يا باشا
:)
ضحكتيني يا ذربونه هانم
يا بنتي صدقيني الصيدليه ملهاش علاقه بالدراسه
يمكن بس اللي هتحتاجيه هوا الفارما ويمكن المايكرو وسيوتكس تالته
لكن دول مش عشان اسامي الادويه
دول عشان تعرفي كل دوا بيعمل ايه وبيشتغل ازاي
لكن الاسامي دي بقي بالخبره
عموما انا برضو كل منزل صيدليه
اتخنقققققققققق
عشان كده قررت اضيع الاجازه دي في دورة اكلينيكي في عين شمس
ونشوف حكاية الصيدليه دي بعدين
ربنا يوفقك
ولو الصيدليه مش مريحاكي
ريحي نفسك وغيريها
متعمليش زيي
ضيعت السنه اللي فاتت ... واديني بندم عليها السنادي
:)
ليكوريكا
بجد شكرا ليكوا كلكم
غالبا كلكم نصحتونى اكمل
انا فعلا حطالى اسبوعين لو بعدها الدنيا ما نورتش شويه يبقى خلاص
معلش انا منقطعة عن النت فترة
تحياتى ليكو كلكم
ذربونه
أنا لاحظت ان الناس كلها نصحتك بحاجه
وأنا ابليس الوحيد اللى فيهم قولتلك كبرى
سيبك منى واسمعى كلامهم
يلا سلام
ماتطوليش فى الغيبه
إرسال تعليق