الله اكير الله اكبر ادان الفجر ااه انا مش قادرة..طب لما يخلص ادان..الحق انام الدقيقه دى هممم الادان خلص قومى يا ذربونة بأه مش معقول المرة اللى تصحى على الادان ماتصليش..و بعدين انتى اصلا عطشانه قومى اشربى و صلى
و اقوم اصلى و انا مش عاوزة افتح عينى اوى عشان النوم مايروحش منها
و اشرب وادخل عشان انام
و فجأه
"يمكن كلمة واحده تنهى كل الحكايه..يمكن لحظة واحده تبقى فيها مش معايا..هبقى فى بلاد بعيده وانتى فى بلاد بعيدة ينزل ستار ما بينا على كلمة النهايه"
ايه اللى فكرنى بالأغنيه دى..
نامى يا ذربونة و استهدى بالله..
ايوة هتنامى اهو
و تانى "محتاجلك ايوة عارف وانتى فرحة سنينى..لو سهل تسيبى قلبى مش اسهل تفهمينى؟؟..هبقى فى بلاد بعيدة وانتى فى بلاد بعيدة ينزل ستار مابينا على كلمة النهايه..يمكن كلمة واحدة.."
باااااااااس..ايه الاغنيه الكئيبة دى اصلا..اخرسى بأه و نامى..
"اعوذ بالله من الشيطان الرجيم"
طب يا ذربونة ما تختمى الصلاه..يمكن تنامى بعدها
"سبحان الله و بحمده سبحان الله العظييم..سبحان الله و بحمده سبحان الله العظيم" ايه يابنتى التخلف اللى انتى فيه ده..يا بنتى ختم الصلاه بيبقى سبحان الله و الحمد لله و الله اكبر لما انتى مش عارفه تركزى كده ماتنامى بأه
و . . . . .
"يمكن كلمة واحده تنهى كل الحكايه.."
باااااااااااااااااااااس حبكة معاكى غنى يعنى..ماشى..انا هعرفك يعنى ايه غنى..
"قوم يا مصرى مصر دايما بتناديلك..قوم و (بلا بلا بلا) مصر دين واجب عليك"
غنى بأه ياختى اوى مادام صوتك عجبك
لو مش عاجبك الاغنيه اتخمدى و نامى بأه
خلاص هنام اهو
. . . . . .
"يمك ..." والله لو كملتيها لأخليكى تقومى تخبطى راسك فى اقرب حيطة...
اتخمدىىىىىىىىىىىىىىىى و نااااااامىىىىىى
انتى امثالك مالهمش نوم اصلا قومى يا ست ذربونة اقرى اى كتاااب
هممم كتاب ايه ده
"اشهر و اغرب الحوادث"
قشطة..عشان ما يجيلكيش نفس تغنى بعدها اصلا
"لم تكن ام الطفل منصور و هى تنتظره فى الشباك تعلم انها لن تراه مرة اخرى ..الخ الخ الخ"
لسه مش كابس عليكى النوم
خلاص اقرى اللى بعده
"كانت اغرب حادثه حققت فيها..و كان المتهم(عفريت) .. الخ الخ الخ"
ايوه عنيكى بدأت تقفل اهى..ايوه السطور ما بقيتش ثابته..ايوة هو ده النوم يا عزيزتى ذربونة
الحمد لله
خخخخخخخخخخخخخخخخخ
و....
"بمكن كلمة واحده تنهى كل ...."
حسبى الله و نعم الوكيييييييييييل النور طلع يا شيخة اصحى
هناك 38 تعليقًا:
بوست جميل اوى يا زربونة وانتى شكلك امورة خالص ومتزعليش من نهاية القصة لو بايدى مكنتش البطلة تموت بس اعملها اية بقى هى اللى مبتاخدش بالها من الطريق وهى نازلة من الاتوبيس
تحياتى لمدونتك الرائعة
ايه اللى خانقك يا زربونة
ايه البوست اللى فات ده
انتى حطلعى زرابينك على نفسك
لا فكى كده
و كبرى دماغك
و بالنسبة لبلوجك التانى
انا حطيته فى دماغى و ان شاء الله حعرفة
و لما اروح اعلق هناك
حبقى اغمز لك بس
ممممممممممممممممممم
انا لسه شايف حوار بلوجك التانيه ده
وكان فيه مناظره بينى وبين حد تانى على انك تبع المدونه دى ولا لأ
وانا كنت معترض بس الحوار اتأكد بحاجتين كده مش مهم ذكرهم
بس انا عرفته
ووالله ماكنت هسيح
-----------------------------------
بالنسبه للينكات للبوست اللى عندى
أنا كنت هاعملها بس كنت مستعجل
ده غير ان انا ناقل الليست اللى عندى بالترتيب يعنى لو حد فى نيته يدخل عند حد هيلاقيه فى الليست
-----------------------------------
انا كنت كاتب قصه قصيره فى بلوجى القديمه عن الحوار ده
بس فين بأه
الله يرحمها
ولو ضربت معاكى تصحى اصحى
عادى يعنى
ولو طلبت معاكى تغنى غنى
انا مره اعدت اغنى الساعه اتنين بالليل بصوت عالى وصحيت اخويا من النوم يومها وكانت مشاكل
وصوتى اصلاً ما يتسمعش
ماتخليش فى نفسك حاجه
سلامز
ساره على
يا هلا و سهلا فيكى على رأى العرب:)
منورة الكشكووول
و بعد كده لبسيها نضارة
مواطن مصرى نايم
يا مصرى و الله الخنقه مش بمزاج الواحد
بس سيبك من البوست الى فات
ايه رأيك فى ده؟
اما عن بلوجى التانى ففكك من الحوار ده
انا هنا وسط ورقى المكرمش
oss
ايه حكايه بلوجى التانى معاكوا النهاردة
هو ورق مكرمش مش عجباكو ولا ايه
عموما انا هنا ذربونه هانم..و كل اللى عرفته هنا هيفضل عارفنى على انى ذربونة هانم
اما عن لينكات البوست
فمعلش العتب على النظر..الواحد شكله عجز
اما عن الاغانى
فالحوار فى القصه دى بينى و بين عقلى
حتى الاغنيه كانت بتتغنى جوا دماغى مش يصوتى
منعا لأى خسائر بشريه
ههههههه
انتي عارفة المفروض كنتي تكملي الأغنية
وتعيدي فيها لغاية ما تزهقي من نفسك
ومن الأغنية وفي الآخر مش هتلاقي مفر غير
انك تنامي
:)
اه.. علي فكرة كتبت بوست جديد
سلامز
هههههههههه......أحم أحم...معلش انا اسف انى بضحك على قلقك فى النوم بس بصراحه...ههههههههههه......أحسن تستاهلى علشان تبطلى تسمعى أغانى كتير لغاية ما تعلق فى دماغك كده وبالذات فى فترة الليل(الا بالحق مين اللى بيغنى الأغنيه الكئيبه دى علشان مسمعوش ابدا لو فكرت فى يوم أسمع أغانى؟) حاجه تانيه بقى طبعا سيادتك مغيره مواعيد نومك علشان التدريب اللى فى الصيدليه ومواعيد الشغل الجديده فاللى بيحصل ده طبيعى لحد ما تنتطمى فى مواعيد ياخد عليها عقلك فى النوم كل يوم.....استحملى بقى الفتره دى وربنا يعديها على خير......وكالعاده شكرا ليكى على البسمه اللى بترسميها على وشوشنا ببوستاتك اللذيذه....سلام
لأ ازاى
والله العظيم ورق مكرمش دى تحفه
وبعدين انا عرفتك من ورق مكرمش مش من البلوج التانيه
لو الحوار ده يزعلك خلاص
نكنسل عليه
سلاموز
طيب ما كنتى قومى صلى يا بنتى هو الشيطان لما يكركب الدنيا كده
معلش معلش فكرى بقى
حلو البوست
دمه خفيف مووت
بس اشمعنى الغنيه دى يعنى اللى علقت معاكى اوى كدا؟
ههههههههههههههه
ذرنوبة فعلا هههههه
مو هارد غير رد واحد:
"يمكن كلمة واحده تنهى كل الحكايه..يمكن لحظة واحده تبقى فيها مش معايا..هبقى فى بلاد بعيده وانتى فى بلاد بعيدة ينزل ستار ما بينا على كلمة النهايه"
عافة عشان تنامى....خليكي صاحية!!! :)
سؤال وجيه من انسان حشري..اللى هو انا
اشمعنى الاغنية دى...السر في شويبس
ــــــــــ
اول زيارة واتمنى زيارتك لنا وتمرى مر سريع ع المدونة كلها
الله يا ذربونه
بس غنوة مين دى
اللى جيبالك الارق ده ومش عايزاكى تنامى
عارفه يا ذربونه
نفسك متخانقه معاكى زى نفسى بالضبط
هى متمردة شويه
وانتى مش عايزاها كده
حاولوا تتصالحوا
يمكن ربنا يوفق
سلامى
زربونة
والله جي هنا بعقلي ... منك لله مش عارف هو انا لسه بعقلي ولا راح ... أعتقد في النهاية كان حلم صح ... يوووووووووووووه مش عارف أركز ... هو حلم , أيوة حلم وبيحصلنا كتير
بصراحة أحييكي بشدة ع البوست الشديد ده والله خلتيني بفكر وده علامة إيجابية ... ياللا بقي سلاموز أروح اشوف البوست مرة تانية يمكن عقلي يرجعلي ولا حاجة
eman
اه انا فكرت فى كده
بس والله يا ايمى ماجتش بفايده
بالعكش ثبتت اكتر
و انا فرحانة كتيير انك رجعتى للكتابة
و طبعا ردى هناك سبق ردى هنا
محمد داود
لا ياعم اضحك براحتك
ده الهدف اصلا
:)
اما عن الى بيغنى الاغنيه فهى فرقة وسط البلد
و انا ماكنتش سمعتها اصلاا بقالى فترة
ده الى خلانى مستغربه انا ايه الى فكرنى بيها
oss
لا يا اسامة يزعلنى ايه
براحتك
بس نرجو السريه التامة
appy
و الله كنت صليت اصلا
اعمل اكتر من كده ايه
السلام عليكم
هههههههههههههههههه
ههههههههههههههههههههههههههه
انا بيثحصلي كده بس ايام الامتحانات رغم ان كل اللي بنامه ده لو نمت اصلا بيبقى ساعة او اتنين لكي ان تتخيلي ان في المده ديه بقعد افتكر حاجات غريبه واعمل اصوات اغرب
وفي الاخر مش بنام
وربنا معاكي
اه انا قريت الموضوع للي فات خطوه كويسه انك تتدربي في مجالك حتى لو السنه ديه مش فهمتي اوي
السنه الجايه هتستفادي اكتر باذن الله وربنا يعملك الصالح
هههههههههههههههههه
بجد ضحكتينى جدا
حلو الحوار مع النفس اوى
بس ايه لااغنيه المصره دى بجد؟؟؟
اغنيه مين؟
علشان يمكن تعمل معايا اللى عملته معاكى
blue wave
ميرسى
و الله مش عارفه..الله اعلم هى علقت معايا ليه
تحياتى ليك
عبد الله حسنى
تصدق هاعضك يا عبد الله
اهو كده الليله دى كمان مش باينلها نوم
مش عايزة اسمع كلمة يمكن دى تانى
اما ليه الاغنيه دى
فوالله مش عارفه
يمكن عشان انا لما سمعتها كانت عجبانى اوى حتة"يمكن لحظة واحدة تبقى فيها مش معايا"
و ان دى معناها ان يمكن لحظة تغيبى فيها و تبقى دى بالنسبه ليا النهايه
كان معكم الناقدة الفنيه ذربونة
عيله مفتريه
كالعادة منورة ورقى
دى اغنيه لفرقه وسط البلد
اما عن نفسى الخانقه معايا
فاحنا قربنا نقطع فى بعض
مش كفايه عليا دبان وشى الى بتخانق معاه اليومين دول
يلا ما علينا
كفايه انك منورة هنا
حمادة زيدان
ميرسى كتيير على ردك
و اهلا بيك فى اول زيارة هنا
هو ده مش حلم
ده والله حصلى فعلا بنفس الجمل
و ده انا بكلم نفسى
هى كانت ليله ارق ممله
ربنا ما يعيدها
bota
انتى برضه ماردتيش عليا اسمك ده معناه ايه
انا فرحانة كتير لضحكتك الحلوة دى
اما عن الاصوات فانا الحمد لله اللى بينام معايا فى الاوضة بيفتكر ان عندى قطة
و فى ايام الامتحانات مرة صاحبتى بتصحينى قلتلها"انا ضابطة الساعة..لما الايونات الموجبه تخلص هبقى اصحى"
انا ايام الامتحانات دى ليا فيها صولات و جولات
لست ادرى
مش عارفه ليه اول ما قريت الاسم ده افتكرت احمد حلمى و هو بيغنى لست ادرى فى فيلم زكى شان باين
الاول ورقى المكرمش منور
تانيا برضه فرحانة بالضحكة دى
يارب دايما
ومش مهم احنا ننام خالص
:)
تحياتى
تقريبا انا شفت
حلقة زي دي في توم اند جري
معلش بتحصل كتير في افضل
الافلام الكرتونية
معلش انا اكتشفت
الغلط في الموضوع الاخير
و صلحته
ااااااااااااسسفة جدا
اتمنى اشوفك هناك
عاشقة الحب
يا جميله انا ماكنش عندى مشاكل فى قرايه بوستك
انا حتى رديت عليه..بعد ماتفقعت مرارتى
اهلا بيكى هنا و منورة ورقى المكرمش
و يارب تفضلى تزورينا
يمكن عشان انا لما سمعتها كانت عجبانى اوى حتة"يمكن لحظة واحدة تبقى فيها مش معايا"
و ان دى معناها ان يمكن لحظة تغيبى فيها و تبقى دى بالنسبه ليا النهايه
ههههههههههههههههههه
شكل الاغنية دى بتخلي جسمك يقشعر
خلاص طالما الحكاية كده
كل شوية قبل النوم افتكريها ومش هتنامى خالص
بدّل ماتجيبي شاى وقهوة وهورس باور
الاغنية دى منبه قوى جدا للسهر ههههههههه
هههههههههههههههههه
أسلوبك جميل اوى فى العرض
كل ده عشان تنسى الاغنية ...
بس بقى دى أغنية مين دى انا اول مرة اسمع عنها
بس أهم حاجة انك نمتى ...
حكاية كل يوم ...
الواحد المفروض يظبط المنبه قبل المعاد بساعة عشان يعرف يقوم ...
هههههههههههههههههه
ذربونه هانك انتى عسل اوى
اوى بجد
ودمك خفيف مووووووووووووت
وبعدين انتى اصلك جيتى ع الجرح
بتعدى عليا اوقات ابقى هموت ع النوم
ونفسى عينى تغفل بس
وورايا حاجات الصبح وهصحى بدرى
وتلاقى افكار كدا معينه ملاحقانى
سواء اغنيه بقى والا غيره
المهم انى مبعرفش انام من كتر التفكير
ببقى نفسى اسكت نفسى
ومش عايزه اكلمها
وياسلام بقى لو تخاصمنى شويه
انما ايه
دى بتموت فى الرغى معايا
مدونتك دى رائعه
بس انتى ايه حكاية البلوج التانى اللى الناس بتتكلم عنه ؟
انتى حذفتى بلوج قديم وانشاتى ده ؟
بس دا جميل اوى
بعد اذنك انا هتابعك لو معندكيش مانع :)
والنعمة والنعمة بتحصل لى كتيييييييير انت تحفة بجد بس عندى سؤال رفيع هى دى اغنية مين اساسا؟؟؟؟
عبد الله حسنى
احم احم احم
عمرو وجيه
اغنيه لوسط البلد
و انا مانمتش غير دقيقتين اصلا
:'(
محمد هشام
انا مفهمتش موضوع ضبط المنبه
انا بيتهيألى العكس
amal
منورة ورقى المكرمش يا جميله
انا فعلا بتضايق جدا لما نفسى ماتبطلش رغى معايا
اما عن الاغنيه فهى لفرقه اسمها وسط البلد..انا شكلى عملتلها دعايه جامده
اما عن البلوج التانى زز فهو الحمد لله لسه موجود بس ده ليا و لصحابى
وانا حبيت تكون ليا حاجة لوحدى هنا افضفض فيها مع اى حد المهم مايكونش عارفنى
فاستخبيت فورقى المكرمش ... بس
و تنورى هنا فى اى وقت..ده نور للبلوج
enjy
ميرسى يا جميله
الاغنيه اغنيه لفرقه وسك البلد اسمها يمكن
انا قلت الجمله دى فوق التلاتين مرة
:)
إرسال تعليق